Blogger Tips and TricksLatest Tips And TricksBlogger Tricks

ఆదివారం, ఫిబ్రవరి 21, 2016

324 - మాతృభాష [తెలుఁగు] వెలుఁగు (గర్భకవిత్వము)

అయుత కవితా యజ్ఞము
Sk-167
గుండు మధుసూదన్
వరంగల్

తేది: 21-02-2016
కవిత సంఖ్య: 324

శీర్షిక:- మాతృభాష [తెలుఁగు] వెలుఁగు (గర్భకవిత్వము)

ద్విపద, మత్తకోకిల, కంద గర్భిత సీసము:

సీసము:
చేతు జోతలు, చేర్చి శ్రేష్ఠద చిత్తమున్
…..మహి భారతీ! చనె  మాతృభాష
మాత! యాంగ్లమె నేఁడు  మాధ్యమ  మంచు దా
,,,,,నినె నేర్చుచున్ దెలుఁ  గని యనఁగను
రోఁత యంచును దెల్గు  రీతుల రోయుచుం
…..డ్రిట హెచ్చుగా నదె  మృతిఁ గొనెనని
చేత మందున నుల్లసిల్లుట సిగ్గు సి
…..గ్గయ సోదరా యనకయ పలువలు

తే.గీ.
తెనుఁగు తొలగగ విడచి; రిదె వినసొంపు
గఁ జనెడి తెనుఁగు విడుతురె  కట్ట! యింక
మారుఁడోయయ్య! మనదైన  మాతృభాష
తెలుఁగు వెలుఁగులు లోకాన  నిలుపుఁడయ్య!


ఈ పైన రచించిన సీసమందును…తేటగీతియందును గర్భితమైన పద్యములు ఇవి:

1. ద్విపద
2. మత్తకోకిల
3. కందము

వాటిని వరుసగఁ గ్రింద నిచ్చుచున్నాఁడను. చూడుఁడు:

1. గర్భిత ద్విపద

చేతు జోతలు చేర్చి  శ్రేష్ఠద చిత్త
మాత! యాంగ్లమె నేఁడు  మాధ్యమ మంచు
రోఁత యంచును దెల్గు  రీతుల రోయు
చేత మందున నుల్లసిల్లుట సిగ్గు


2. గర్భిత మత్తకోకిల

చేతు జోతలు చేర్చి శ్రేష్ఠద  చిత్తమున్ మహి భారతీ
మాత! యాంగ్లమె నేఁడు మాధ్యమ  మంచు దానినె నేర్చుచున్
రోఁత యంచును దెల్గు రీతుల  రోయుచుం డ్రిట హెచ్చుగా
చేత మందున నుల్లసిల్లుట  సిగ్గు సిగ్గయ సోదరా


3. గర్భిత కందము

చనె మాతృభాష తెలుఁగని
యనఁగను నదె మృతిఁ గొనె నని  యనకయ పలువల్
తెనుఁగుఁ దొలగగ విడచి; రిదె
వినసొంపుగఁ జనెడి తెనుఁగు  విడుతురె కట్టా!

(మిత్రులందఱకు మాతృభాషా దినోత్సవ శుభాకాంక్షలతో)

-:శుభం భూయాత్:-
******************
సుకవి జన విధేయుఁడు
గుండు మధుసూదన్
వరంగల్



వ్యాఖ్యలు లేవు:

వ్యాఖ్యను పోస్ట్ చెయ్యండి